Geste-barrièren

Esou laang ewéi et keen effikassen Traitement a keng Impfung gëtt, musse mir léieren, mam Virus ze liewen. Dofir ass et wichteg fir verschidde Virkéierungen ze treffen, zousätzlech zum Droe vun enger Mask, fir datt de Virus sech net an der Populatioun a besonnesch bei ufällegen a vulnerabel Persoune verbreede kann.

Dat Allerwichtegst ass, dass Dir Iech reegelméisseg a richteg d'Hänn wäscht.

Houscht oder néitscht an den Ielebou oder e Nuesschnappech aus Pabeier, dat Dir dono an eng Dreckskëscht mat Deckel gehäit.

Verzicht drop anere Leit d'Hand ze ginn oder se ze këssen.

Evitéiert den noe Kontakt zu kranke Leit an haalt een Ofstand vun op d'mannst 2 Meter.

Vermeit et esouvill wéi méiglech fir Äert Gesiicht mat Ären Hänn ze beréieren.

Limitéiert Är Deplacementer op dat Néidegst.

Maskeflicht an Distanzen

Et muss eng Mask gedroe ginn:

  • ënner allen Ëmstänn bei ëffentlech zougänglechen Aktivitéiten, wou de Public an engem geschlossene Raum zirkuléiert (z.B. ëffentlech Administratiounen, Butteker oder Supermarchéen) oder am ëffentlechen Transport;
  • bei all Versammlung vu méi wéi 4 Persoune, dobannen oder dobaussen.

Zousätzlech zu der Mask ass bei Versammlunge vu 4 bis 10 Persounen (inclus) eng physesch Distanz vu mindestens 2 Meter virgeschriwwen. Dës Obligatioun gëllt net fir Persounen, déi zum selwechte Stot gehéieren oder zesumme wunnen.

Nieft der Flicht eng Mask ze droen an eng physesch Distanz vu mindestens 2 Meter anzehalen, sinn zougewise Sëtzplaze bei Versammlunge vu méi wéi 10 a bis 100 Persounen obligatoresch.

Vun dëser Flicht eng Mask ze droe sinn net betraff::

  • Kanner ënner 6 Joer;
  • Leit déi opgrond vun engem Handicap vun der Maskeflicht entbonne ginn;
  • Riedner oder reliéis Acteure wärend der Ausübung vun hire berufflechen Aktivitéiten;
  • Acteuren aus dem Theater- a Filmberäich, Museker, Dänzer wärend der Ausübung vun hire berufflechen Aktivitéiten;
  • Persoune wärend dem Sport.

D'Flicht 2 Meter Distanz anzehale gëllt net fir Mäert am Fräien, sou wéi och net beim Benotze vum ëffentlechen Transport.

D'Obligatioun Sëtzplazen zougewisen ze kréien, gëllt weder am Kader vun der Demonstratiounsrecht, nach bei Begriefnesser, Mäert, Muséeën oder Kulturzentren, nach am Zesummenhang mat sportlechen Aktivitéiten.

FAQ

Wéini soll een eng Mask undoen?

Am ëffentlechen Transport a bei all Aktivitéiten, déi fir de Public op sinn (Commercen, Guicheten, Recyclingszenteren, Muséeën, Bibliothéiken a Mäert) ass et virgeschriwwe sech Mond a Nues mat enger Mask, engem Foulard oder Bandana ze bedecken.

D'Droe vum Mask ass och obligatoresch bei Versammlunge vu méi wéi 4 Leit, souwuel banne wéi och dobaussen, ausser wann dës Persounen Deel vum nämmlechte Stot sinn oder zesumme wunnen.

A verschiddene Beräicher kënnen d’Bestëmmungen och nach méi streng sinn.

D'Net-Anhale vun der Maskeflicht an/oder der Distanzéierung tëschent Sëtzplazen ass eng Infraktioun a ka mat enger Geldbouss bestrooft ginn.

Wie brauch keng Mask unzedoen?

Kanner ënner 6 Joer brauche keng Mask ze droen. Kee Kand brauch eng Mask, wann et un Aktivitéiten am Kader vu formaler oder net formaler Bildung matmécht.

Persoune mat spezifesche Besoinen, déi opgrond vun hirem Handicap keng Mask kënnen undoen, falen net ënnert d'Maskeflicht, ënnert der Bedéngung, datt si aner sanitär Mesuren ëmsetzen, fir d'Verbreedung vum Virus ze verhënneren. E medizineschen Attest bestätegt d'Onméiglechkeet fir eng Mask unzedoen.

D'Chaufferen am ëffentlechen Transport brauche keng Mask unzedoen, wann d'Distanz tëschent hinnen an de Passagéier grouss genuch ass oder wa si duerch e Panneau vunenee getrennt sinn.

Wann eng Aktivitéit opgrond vum Mask net méiglech ass (z. B. Gesiichtsfleeg), da mussen aner Mesuren ëmgesat ginn, fir eng Ustiechung ze verhënneren. Sou kann d'Personal eng Visière a Kombinatioun mat enger Mask, oder eng FFP2-Mask bei der Betreiung vum Client undoen.

Reliéis, kulturell a sportlech Acteure brauche keng Mask, wann si hir Aktivitéit ausüben.

Kënne Plasitiksvisièren d'Masken ersetzen?

Nee, Plasitiksvisièrë schützen d'Aen, mee net d'Nues an de Mond. Dofir ass eng Visière eleng keen effikasse Schutz géint de Coronavirus.

Wéi ginn ech mat enger Mask ëm?

Déi Eewee-Masken kënnen net gewäsch ginn an si mussen an d'Dreckskëscht gehäit ginn, nodeems ee se maximal 8 Stonnen ophat. Op de Këschte stinn de Produktiounsdatum an de Verfallsdatum am internationale Format: Joer/Mount/Dag.

Selwer gebitzte Masken aus Stoff, Schalen oder Dicher kënne méi dacks benotzt ginn, ënnert der Konditioun, datt se all Dag nom Gebrauch bei 60 Grad gewäsch ginn.

Fir méi driwwer gewuer ze ginn, wéi ee richteg mat deene Masken ëmgeet, zéckt net, eis Recommandatiounen ze liesen. Well eng Mask ze droen ass just een zousätzleche Geste barrière, well si d'Verbreedung vun deene klengen Drëpse verhënnere kann, déi de Virus iwwerdroen. Mee esou eng Mask kann de Risiko erhéijen, fir sech unzestiechen, wann een net richteg domadder ëmgeet. 

Eng Mask iwwert engem Baart: geet dat?

Op jiddwer Fall muss d'Mask gutt a fest um Gesiicht sëtzen, soss ass net sécher, datt se och eppes déngt. De Baart muss propper sinn an, wann e laang ass, ewéi Hoer um Kapp zesummegebonne ginn. Dat gëllt esouwuel fir chirurgesch Masken ewéi fir aus Stoff gebitztener.

Fir bei enger FFP2-Mask, déi Dokteren oder medezinescht Personal opdinn, ze garantéieren, datt se dicht ass, dierf de Baart net iwwert de Rand vun der Mask erauskucken.

Kann ee sech mat Händschen effektiv géint de Coronavirus schützen?

Am Alldag schützt reegelméissegt Hännwäsche besser géint de Coronavirus ewéi Händschen unzedoen. Well Händschen verhënneren net, datt de Virus sech vun enger Plaz op déi aner iwwerdréit. Wann Dir eppes upaakt mat Händschen, wou de Coronavirus drop ass, da kritt Dir de Virus op d'Händschen a vun do aus verdeelt Dir en op déi Plazen an déi Saachen, déi Dir upaakt, ewéi Klenschen, Schlësselen, Handy, Posch, Portmonni asw.

Eng hydro-alkoholesch Léisung desinfizéiert Händschen net effektiv. An de Risk ass net auszeschléissen, datt Dir de Virus op d'Hänn kritt, wann Dir d'Händschen ausditt.

Am Fong hunn Händschen eng Partie Nodeeler:

  • Dir kritt domadder e falscht Gefill vu Sécherheet a passt eventuell net méi genuch drop op, déi Geste-barrièren ze respektéieren, déi essentiell sinn.
  • De Risk vun enger Infektioun mam Coronavirus kann esou eropgoen.
  •  
  • Den Impakt op d'Ëmwelt ass negativ, well déi meeschten Händschen, déi just eemol gebraucht ginn, sinn net ze recycléieren an net biodegradabel.

Wéini soll een Händschen undoen?

Händsche fir ewechzepuche si fir d'Personal vun der Santé reservéiert, wann si Persoune mussen upaken, déi kënnen infizéiert sinn, mam Coronavirus oder soss enger ustiechender Krankheet. Bei der Fleeg sinn de Gebrauch vun esou Händschen an dat reegelméissegt a korrekt Wäsche vun den Hänn onëmgänglech. Mee ausser an der Fleeg vun enger Persoun mat enger ustiechender Krankheet kann een Händschen net recommandéieren. Händsche fir den eemolege Gebrauch sinn net derfir geduecht, am alldeegleche Liewe benotzt ze ginn.

Last update