Impfung

D'Impfung ass de wierksaamste Wee fir Infektiounskrankheeten entgéintzewierken. Se erméiglecht et eis, eis selwer an och eis Matbierger ze schützen. Unhand vun de kollektive Beméiunge vun der weltwäiter medezinescher Communautéit, kënne mir eis elo glécklech schätzen, Zougang zu SARS-CoV-2-Impfstoffer ze hunn. Dëst ass ee wesentlecht Element am Kampf géint de COVID-19 a wäert eis hëllefen d'Pandemie an hier Auswierkungen op ons Gesondheet an ons Gesellschaft anzedämmen.

Déi lëtzebuergesch COVID-19-Impfstrategie ënnerstëtzt den Zougang zu sécheren an effikassen Impfstoffer an hirer Disponibilitéit, esou bal se op de Marché kommen.

Dës wäert déi gesondheetlech, sozial a wirtschaftlech Konsequenze vun der COVID-19-Pandemie reduzéieren. Den Impfstoff wäert dozou bäidroen, Liewen ze retten an eis Ressourcen sou gutt wéi méiglech ze notzen.

Et bleift weiderhi wichteg, wärend der Ëmsetzung vun der Impfstrategie déi sanitär Mesuren ze respektéieren an e Mask ze droen.

E Rendez-vous huelen:

  • Dir gitt per Post fir d'Impfung invitéiert.
  • D'Invitatioun enthält e personaliséierten Zougangscode, deen zwou Woche laang gülteg ass an net verlängert ka ginn!
  • Mat dësem Code kënnt Dir online Rendez-vous huelen iwwer www.covidvaccination.lu
  • D'Impfung muss widderholl ginn: denkt also wgl dorun, en zweete Rendez-vous mam selwechte personaliséierte Code ze huelen.

Opgepasst: D'Impfung kann net an enger Dokteschpraxis oder an engem Spidol duerchgefouert ginn. Falls et Iech technesch net méiglech ass, e Rendez-vous online ze huelen, kontaktéiert wgl d'Helpline Santé: 247-65533.

Impfzenteren:

Hutt Dir e Rendez-vous fir d'Impfung?

Gitt wgl mat Ärer Confirmatioun, Ärer Krankekeesskaart an Ärer carte an den Impfzenter. 

InfoVAXX:

Ënnert dëser Rubrik fannt Dir Informatiounsmaterial, dat vun der Lëtzebuerger Regierung am Kader vun der COVID-19-Impfcampagne konzipéiert gouf.

Dir kënnt dëst Material eroflueden a fräi fir Är Sensibilisatiouns- an Informatiounsaarbecht benotzen. Infovaxx gëtt permanent ausgebaut an aktualiséiert. 

FAQ

Impfstrategie

Wie gëtt fir d'éischt geimpft?

An enger éischter Phas wäerten net genuch Impfdosissen disponibel sinn, fir datt jidderee gläichzäiteg geimpft ka ginn. Dohier ass et wichteg Prioritéiten ze setzen.

Am Kader vun der Krisegestioun vum COVID-19 ass dat éischt Zil, d'Gesondheet vun de Biergerinnen a Bierger ze schützen, virun allem vu vulnerabele Persounen a Persoune mat héijer Infektiounsgefor. D'Zil ass et, déi beschtméiglech medezinesch Versuergung fir COVID-Patienten ze garantéieren an d'Kapazitéit vum Gesondheetssystem, besonnesch vun de Spideeler, oprechtzeerhalen.

D'Personal aus dem Gesondheetssecteur oder déi, déi a Spideeler oder Altersheemer schaffen, gehéieren zu den am stäerkste dem COVID-19 ausgesate Persounen a verdéngen dohier besonnesch Opmierksamkeet a Schutz, dëst och fir e "Cordon sanitaire" ronderëm déi infizéiert Persounen, ëm déi se sech këmmeren, ze forméieren.

Nom nämmlechte Prinzip gi Persounen déi an Altersheemer liewe prioritär geimpft. Effektiv sinn den Alter an d'Presenz vu Comorbiditéite Risikofacteuren déi Eescht geholl musse ginn.

Iwwert d'Prioritéite vun anere Bevëlkerungsgruppe gëtt zu engem spéideren Ament decidéiert, jee no Disponibilitéit vun zousätzlechen Impfdosissen. 

Wéini gëtt de Rescht vun der Bevëlkerung geimpft?

De Rescht vun der Bevëlkerung wäert jee no Disponibilitéit vun den Impfstoffer an der Impfstrategie geimpft ginn. Et ass héchst probabel, dass sech d'Impfcampagne bis wäit an d'Joer 2021 zéie wäert. 

Asazstrategie

Wéi ass d'Prozedur vun der Impfung?

Persounen, déi unhand vun der Prioritéitereiefolgen an där si zougeuerdent goufen, identifizéiert goufen, gi per Post agelueden sech impfen ze loossen.

All Invitatioun enthält e personaliséierten Zougangscode, deen et dem Empfänger erméiglecht, sech iwwert eng elektronesch Impf-App ze verbannen.

De Bierger kann een Impfzenter an eng preferéiert Zäitfënster wielen (jee no Disponibilitéit vun de Rendezvousen). Deen Ament wou de Bierger e Rendezvous hëlt, muss en Informatiounen zu sengem Gesondheetszoustand uginn.

Doriwwer eraus wäert déi Persounen d'Méiglechkeet hunn, sech un eng vun der Gesondheetsdirektioun bedriwwen Hotline ze wenden, fir Ënnerstëtzung beim Huele vun engem Rendezvous ze kréien.

D'Bierger mellen sech mat hirem Bestätegungsschreiwes an der Rezeptioun, déi eng graff Iwwerpréiwung vun den Donnéeë mécht an dës, wann néideg, vervollstännegt. De Patient geet da bei den Dokter, deen d'Informatioune vum Patient consultéiert. Den Dokter fëllt deen zweeten Deel vum Impf-Froebou aus, wielt de gëeegenten Impfstoff aus, gëtt dës Donnéeën an d'Applikatioun an an druckt d'Impfzertifikat aus. Sollt de Patient no der Impfung am Erhuelungsberäich onerwënschte Wierkunge verspieren, da gëtt d'Persoun vum Personal betreit an d'Wierkungen dokumentéiert.

Rendezvouse fir medezinesch vulnerabel Persoune ginn an Ofsprooch mam Dokter vun der betraffener Persoun gemaach.

Wou kann ech mech impfe loossen?

D'Impfzentere ginn esou opgeriicht, dass eng geografesch Verdeelung iwwert dat ganzt Land assuréiert ass. Déi genau Plaze vun de Sitte ginn nach bestëmmt. Fir de Moment goufe folgend Sitten zeréckbehalen:

  • Site Regioun Zentrum – Hall Victor Hugo um Lampertsbierg
  • Site Regioun Süden – Maison des matériaux um Belval

Weider Sitte fir d’Regiounen Zentrum-Osten, Norden an Oste gi grad geplangt. Den Impfzenter an der Regioun Zentrum wäert deen éischte sinn, dee seng Dieren opmécht, an assuréiert esou déi éischt Phas vun der Vaccinatioun. All d’Sitte wäerten operationell sinn, wann de Vaccin bis ukënnt.

Allgemeng

Firwat ass d'Impfung wichteg?

Impfunge gëllen als ee vun deene wichtegste Fortschrëtter vun der moderner Medezin an hunn et erméiglecht, Infektiounskrankheete wéi d'Pouken, d'Kannerlämung, Cholera, d'Gripp oder d'Riedelen ze bekämpfen.

D'Zil vun der Impfung ass et, dem Individuum e spezifesche Schutz géint en Erreeger ze bidden, fir eng Infektioun an hir Konsequenze bei engem spéidere Kontakt ze vermeiden. Se bitt een individuelle Schutz géint déidlech Krankheeten, potentiell schwéiere Komplikatiounen oder viru Krankheeten, fir déi et keng kurativ Behandlung gëtt.

Se schützt net nëmmen den Individuum, mee déngt och dozou eng "Häerdenimmunitéit" ze schafen, fir vulnerabel Persounen an déi, déi net geimpft kënne ginn, ze schützen.

Impfstoffer verhënneren all Joer weltwäit bis zu 3 Milliounen Doudesfäll an hu säit 1990 zu engem Réckgang vu 65% bei der Kannerstierflechkeet bäigedroen.

Wéi vill Persoune musse geimpft gi fir eng Häerdenimmunitéit z'erreechen?

D'Herdenimmunitéit ass e Konzept, bei deem d'Populatioun géint e bestëmmte Virus geschützt ass, soubal eng bestëmmte Schwell iwwerschratt ass. Bei der Häerdenimmunitéit gëtt d'Majoritéit vun der Populatioun geimpft, wouduerch d'Gesamtmass vum Virus, déi sech an der Bevëlkerung verbreede kann, reduzéiert gëtt. Dofir muss net all Persoun geimpft ginn, fir geschützt ze ginn, wouduerch vulnerabel Gruppe geschützt kënne ginn, déi net geimpft kënne ginn.

De Prozentsaz u Persounen, déi Antikierper mussen hunn fir eng Häerdenimmunitéit géint eng bestëmmte Krankheet z'erreechen, hänkt vun der jeeweileger Krankheet of. Sou gëtt beispillsweis eng Häerdenimmunitéit géint d'Riedelen, wann Ronn 95% vun der Populatioun geimpft ass. Déi reschtlech 5% si geschützt, well sech d'Riedelen ënnert de Geimpften net méi weider verbreede wäert. Bei Polio läit d'Schwell bei Ronn 80%. Laut verschidde Publikatioune muss e Schwellewäert vu 70% erreecht ginn, fir d'Ausbreedung vum SARS-CoV-2 ze stoppen. Ier een dëst mat Sécherheet soe kann, brauch een awer weider Recherchen.

D'Häerdenimmunitéit mat sécheren a wierksamen Impfstoffer maachen d'Krankheet méi seelen a rett domat Liewen.

Wat si méiglech Niewewierkungen?

Am Allgemenge sinn d'Niewewierkunge vun Impfstoffer an der Reegel geréng. Am heefegste kënnt et zu Féiwer, Kappwéi, Muskelpéng, Middegkeet oder rout Plazen, do, wou d'Impfung gemaach gouf. Obwuel dës onangeneem sinn, verschwannen dës Niewewierkungen an der Reegel bannent ee bis zwee Deeg.

Impfstoffer si Medikamenter. Se erfëllen dohier déi gläich Ufuerderungen un d'Maartzouloossung an un d'Uwendungssécherheet, souwéi déi selwecht Iwwerwaachungskonditiounen, wéi aner Medikamenter. D'Aufgab vun der europäescher Medikamentenagence besteet doran, d'Sécherheet vun den Impfstoffer um Marché ze garantéieren.

Zum Zäitpunkt vun der Maartzouloosung sinn net all déi mam Medikament verbonne Riske bekannt. Dëst gëllt besonnesch fir Impfstoffer géint de COVID-19. Dofir gëtt den Impfstoff oder d'Medikament, wann et op de Marché kënnt an enger grousser Zuel u Persounen zur Verfügung steet, och weiderhi kontinuéierlech iwwerwaacht an analyséiert, an zwar am Hibléck op d'Evolutioun vum Wëssensstand a seng Uwendung am Alldag.

Den Asazplang fir de COVID-19-Impfstoff wäert der aktiver Iwwerwaachung vun der Sécherheet a Wierksamkeet vun Impfstoffproduiten, déi um Lëtzebuerger Marché am Ëmlaf sinn, duerch d'Erhiewe vun Echtzäit-, mëttel- a laangfristeg Donnéeë besonnesch Opmierksamkeet widmen. Et wäerte streng Prozeduren, fir de Suivi vun allen Operatiounen op allen Niveauen ze garantéieren, agefouert ginn, an d'Ëmsetzung vun der Impfstrategie gëtt duerch verschidden informatesch Systemer an Outilen ënnerstëtzt. 

Last update