Restauranten, Baren a Caféen

Restauranten, Baren a Caféë kënne Clientë bannen an op der Terrass empfänken.

Bannent de Gastronomie-Etablissementer, ass de CovidCheck-System ab dem 1. November 2021 obligatoresch. D'Clienten an dat ganzt Personal vun de betraffenen Etablissementer, mussen dann d'Bedéngunge vun dësem System erfëllen. Dat bedeit, si mussen entweder e gültegen Impf-Certificat, e Geheelt-Certificat oder e Certificat mat engem negative Resultat vun engem COVID-19-Test virweisen.

D'Terrasse vun de Restauranten, Caféen a Bare lafen net automatesch ënnert dem CovidCheck-System. D'Bedreiwer vun dësen Etablissementer kënne sech allerdéngs och fir dëse System op der Terrass entscheeden. An dësem Fall, muss d'Terrass strikt ofgegrenzt sinn.

Falls d'Terrasse vun de Restauranten, Caféen a Baren net ënnert dem CovidCheck-System lafen, si maximal 10 Persoune pro Dësch erlaabt, ausser se gehéieren zu engem selwechte Stot.

Ënnert Terrasse versteet een en Espace am Fräien, dee mindestens op 3 Säiten op ass, sou dass d'Loft fräi zirkuléiere kann an eng natierlech Belëftung garantéiert ka ginn. 

CovidCheck

De CovidCheck-System ass ee System, dee fir Privatpersounen a privat an ëffentlech Etablissementer (z.B. Restauranten, Baren, Fitnesszenteren, Butteker, asw.) oder Evenementer (z.B. Sportsevenementer, Concerten, asw.) gëllt, déi fir d'Ëffentlechkeet zougänglech sinn a bei deenen den Zoutrëtt nëmme Persounen (Clienten, Gäscht, Spectateuren, Personal, Opsiichtspersonal) virenthalen ass, déi geimpft, geheelt oder negativ getest goufen  (Selbsttest* op der Plaz, Certificat mat QR-Code oder certifiéiert vun der Éducation nationale). Kanner vu manner wéi 12 Joer an 2 Méint musse kee COVID-19-Zertifikat virweisen. 

*Opgepasst: Selbsttester op der Plaz ginn ab dem 1. November 2021 net méi akzeptéiert!

Fir méi Informatiounen iwwert de CovidCheck-System an d'Prozedur fir de System ze deklaréieren, besicht eis Säit zum Thema CovidCheck-System.

CovidCheck-System

De Restaurant, Bar oder Café muss keng speziell sanitär Mesurë respektéieren, wéi z. B. Maskeflicht fir d'Personal a Kontakt mam Client oder fir d'Clienten, d'Consommatioun um Dësch, d'Distanz tëschent den Dëscher. 

FAQ

Ech bedreiwen e Café/Restaurant. Musse just d'Clienten e Geimpft-, Geheelt- oder Getest-Certificat virweisen? Weekends hëllefen heiansdo Studenten aus. Mussen och si d'Bedéngunge vum CovidCheck-System erfëllen?

Nee. Souwuel d'Clienten, wéi och de Rescht vum Personal, och dat Personal, wat net an direktem Kontakt zu de Clientë steet, wéi de Kach, mussen d'Bedéngunge vun dësem System erfëllen. Dës Obligatioun gëllt net nëmme fir dat permanent oder reegelméissegt Personal, mee och fir all déi aner Leit, déi geleeëntlech am Etablissement matschaffen. 

Ech si Bedreiwer vun engem Café an hunn e puer Leit bei mir schaffen. Muss ech meng Mataarbechter all Dag kontrolléieren?

Am Prinzip, jo. Mat der mobiller CovidCheck.lu-App, kann een effektiv d'Authentizitéit an d'Gültegkeet vun engem Certificat iwwerpréiwen. Aus Dateschutz-Grënn, ginn awer z. B. keng Informatiounen zum Impf-Status vun der Persoun uginn. D'App informéiert just doriwwer, ob de Certificat gülteg ass, ouni allerdéngs ze preziséieren, ob et sech ëm e Geimpft-, Geheelt-, oder Getest-Certificat handelt. 

Meng Terrass läit an engem Bannenhaff. Kann ech do Clienten empfänken, wann ee weess, dass eng Terrass op mindestens 3 Säite muss op sinn?

D'Ufuerderung, dass Beräicher, déi als Terrass benotzt ginn, op mindestens 3 Säite mussen op sinn, huet als Zil déi fräi Loftzirkulatioun an eng optimal Belëftung ze garantéieren. Esou soll vermeit ginn, dass dës Beräicher mat Panneauen oder anere Schutzdispositiffen zougemaach ginn, wouduerch de Bausseberäich kaum nach oder net méi vun engem Banneberäich ze ënnerscheede wier.

Wann de Bannenhaff esou kleng ass, dass d'Loft schlecht zirkuléiere kann an de Beräich net genuch gelëft ka ginn, ass d'Äntwert Nee.

Ech si Cafetier/Restaurateur an ech hunn eng Terrass. Ech hu mech net fir de CovidCheck-System entscheet. Kann ech do ee Schutz géint d'Sonn, de Reen oder de Wand installéieren?

Jo. Et ass duerchaus méiglech esou ee Schutz virzegesinn, dat ënnert der Konditioun dass dës déi fräi Loftzirkulatioun awer net beanträchtegen an eng natierlech Belëftung garantéiert ka ginn. Een Zelt (oder all aner zoue Raimlechkeet), dat virum Lokal opgeriicht gëtt, zielt als Extensioun vum Lokal a gëllt net als Terrass, et sief dann d'Toille oder all anert Material sinn op mindestens 3 Säiten op, sou dass d'Loft fräi zirkuléiert.

Ech si Cafetier/Restaurateur an op menger Terrass sti Panneauen oder fix Elementer, oder d'Reglement vun der Gemeng, an där mäi Lokal steet, imposéiert d'Verwendung vu Panneauen, wann d'Terrass am ëffentleche Raum läit. Meng Terrass funktionéiert net ënnert dem CovidCheck-System. Kann ech trotzdeem do Clienten empfänken an z. B. e Sonneschutz virgesinn?

Verschidde Gemengen imposéieren effektiv d'Verwendung vu Panneauen, wann d'Terrass am ëffentleche Raum läit.

D'Ufuerderung, dass Beräicher, déi als Terrass benotzt ginn, op mindestens 3 Säite mussen op sinn, huet als Zil déi fräi Loftzirkulatioun an eng optimal Belëftung ze garantéieren. Esou soll vermeit ginn, dass dës Beräicher mat Panneauen oder anere Schutzdispositiffen zougemaach ginn, wouduerch de Bausseberäich kaum nach oder net méi vun engem Banneberäich ze ënnerscheede wier.

Wann d'Panneauen oder d'Elementer déi fräi Loftzirkulatioun an déi natierlech Belëftung vum Beräich verhënneren, ass d'Äntwert Nee. Wann, am Géigendeel, dës Panneauen oder Elementer déi fräi Loftzirkulatioun an déi natierlech Belëftung awer net beanträchtegen, ass d'Äntwert Jo.

Dierf een op der Terrass fëmmen?

Jo. Et ass verbueden an engem Restaurant oder Café bannen ze fëmmen, mee net baussen op der Terrass.

Ech si Restaurateur an ech hu mech fir de CovidCheck-System bannen, mee net op der Terrass entscheet. Dierfe Clienten, déi op der Terrass sëtzen, bannen am Restaurant oder Café bezuelen? An dierfen si eragoen, fir en Dësch baussen op der Terrass ze reservéieren?

Am Prinzip gëtt de Clientë recommandéiert baussent dem Lokal ze bezuelen an hir Reservatioune per Telefon ze maachen. Allerdéngs ass et méiglech am Lokal selwer ze bezuelen oder eranzegoe fir een Dësch op der Terrass ze reservéieren oder op d'Toilette ze goen. An deem Fall gëllt d'Maskeflicht bannen am Lokal fir d'Clientë vun der Terrass. D'Personal muss eng Mask ophunn, wann et op der Terrass am Kontakt mam Client ass. 

Ass d'Zerwéiere vun Iessen a Gedrénks als geleeëntlech Aktivitéit oder Niewenaktivitéit méiglech?

D'Zerwéiere vun Iessen a Gedrénks als geleeëntlech Aktivitéit oder Niewenaktivitéit ass verbueden, et sief dann dës Aktivitéite fannen am Kader vu Manifestatiounen oder Evenementer ënnert dem CovidCheck-System statt. 

Mir géife gäre mat eisem Veräin oder eisem Betrib e Grillfest ouni Caterer organiséieren. Ass dat méiglech? An dierfe mir Spiller fir d'Kanner virgesinn?

Jo, awer ënnert der Bedéngung dass Dir mam CovidCheck-System schafft. Mat dësem System kënnt Dir selwer grillen an och Aktivitéite fir d'Kanner organiséieren. De CovidCheck-System erméiglecht Iech Är Veranstaltung ouni Restriktiounen z'organiséieren, och wann dës weiderhi recommandéiert sinn. Kanner ënner 12 Joer an 2 Méint brauche kee COVID-19Test-Certificat virzeweisen. 

Last update