Sport, Kultur, Fräizäitaktivitéiten

Sportlech Aktivitéiten

Sportshalen a Sportsanlagen am Fräie sinn erëm fir d'Ëffentlechkeet zougänglech.

D'Ausübung vu sportlechen Aktivitéiten ass ënnert bestëmmte Konditiounen erlaabt:

  • d'Aktivitéit duerf eenzel oder maximal zu 2 ausgeüübt ginn, ouni d'Obligatioun eng Mask ze droen oder e physeschen Ofstand vun 2 Meter anzehalen;
  • Maximum 10 Persounen duerfe gläichzäiteg eng sportlech Aktivitéit ausüben, virausgesat, datt eng physesch Distanz vu mindestens 2 Meter tëschent de Sportler zu all Ament agehale gëtt;
  • d'Anlage mussen eng Fläch vu mindestens 15m2 fir sportlech Aktivitéite virgesinn, déi vu maximum enger Eenzelpersoun genotzt ka ginn, eng Fläch vu mindestens 50m2 fir Aktivitéiten déi vu maximum 2 Persoune gläichzäiteg genotzt ka ginn an eng Fläch vu mindestens 30m2 pro Persoun fir Aktivitéiten, déi vun 3 bis maximum 10 Persounen ausgeüübt ginn.

A Schwämmen a Waassersportzenteren duerf een nëmmen a speziell dofir virgesinne Bunne schwammen. Et si maximum 6 Sportler pro 50m-Bunn a maximum 3 Sportler pro 25m-Bunn erlaabt.

Och den Zougang zu de Vestiairen an Duschen ass streng gereegelt. Et si maximum 10 Persounen pro Vestiär oder Duschberäich zougelooss. An de Vestiäre mussen d'Persounen entweder eng Mask droen oder eng physesch Distanz vun 2 Meter anhalen. An den Dusche muss déi physesch Distanz vun 2 Meter och agehale ginn.

Déi allgemeng Restriktioune fir d'Unzuel u Leit, déi un enger sportlecher Aktivitéit deelhuelen dierfen an d'Aschränkunge vun der maximal zougeloossener Zuel u Persounen déi gläichzäiteg d'Vestiairen oder Dusche benotzen, sou wéi d'Fläch déi mindestens garantéiert muss sinn, gëllt net fir Sportsgruppen, déi am nämmlechte Stot wunnen oder am Kader vu schouleschen an ausserschoulesche Sportsaktivitéiten. Dëst gëllt och fir d'Reegelen, déi eng Mindestfläch pro Persoun virgesinn.

Sportlech Aktivitéite fir Jonker ënner 12 Joer a Veräiner, déi de Sportverbänn ugehéieren, gi suspendéiert am Fall vun engem Aussetze vun de Presenzcoursen an Aktivitéiten an der Grondschoul.

Elittesport, Manifestatiounen a sportlech Kompetitiounen

Sportveranstalunge sinn net fir d'Ëffentlechkeet op. Et muss een en negativen Test vu manner wéi 72 Stonne virleeë fir u Kompetitioune kënnen deelzehuelen.

Fir Elittesportler, sou wéi hir Trainingspartner an Trainer, Profi-Sportler, Nationalsportler, Schüler aus dem Sportlycée, de "Senior"-Kader vun de Nationalekippen, sou wéi hir Trainingspartner an Trainer, gëlle speziell Reegelen. D'Hygiènesreegelen, déi fir d'Allgemengheet gëllen, gëlle fir si net, weder wärend dem Training, nach wärend de Competitiounen. 

Kultur

D'kulturell Institutioune sinn nees op fir d'Ëffentlechkeet, mee ënner strenge sanitäre Reegelen, nämlech:

  • An de Säll kënne bis zu 100 Spectateuren empfaange ginn, ënnert de Konditiounen, datt se eng Mask droen an eng Sëtzplaz zougewise kréien an de Mindestofstand vun 2 Meter anhalen, wann se net zum selwechte Stot gehéieren oder zesumme wunnen.
  • Muséeën, Kulturzenteren, Ausstellungsraim, Archiven a Bibliothéike kënnen de Public empfänken, virausgesat d'Maskeflicht gëtt agehalen.
  • Professionell Kënschtler (Theater- a Filmschauspiller, Museker an Dänzer) duerfen hir berufflech Aktivitéit (Prouwen an Optrëtter) ouni Mask an ouni d'Anhale vun der Distanzreegel ausüben.
  • Fräizäit- an Amateurkënschtler, sou wéi pedagogesch Aktivitéite bannent den Institutioune si fir bis zu 4 Persounen ouni Maskeflicht an ouni d'Anhale vun der Distanzreegel erlaabt. Et si Gruppe vu bis zu 10 Persounen erlaabt, wann d'Makseflicht an d'Distanzreegel agehale ginn. Et si Gruppe vu bis zu 100 Persounen erlaabt, wann d'Persounen eng Sëtzplaz zougewise kréien an d'Distanzreegel vun 2 Meter agehale gëtt.
  • Komplettéiert ginn dës Mesuren duerch e generellt Verbuet vu Restauratioun oder dem Zerwéiere vu Gedrénks.

Fräizäitaktivitéiten

Fräizäitaktivitéiten am Grupp si méiglech, soulaang sech net méi wéi 2 Persounen dorunner bedeelegen. Fräizäitaktivitéiten an engem Grupp vu méi wéi 2 Leit si verbueden. Wann d'Participanten awer zum selwechte Stot gehéieren oder zesumme wunnen, da gëllt dëse Verbuet net. 

FAQ

Ka COVID-19 duerch Schweess iwwerdroe ginn?

Bis haut gëtt et keng wëssenschaftlech Beweiser, datt de Virus duerch Schweess iwwerdroe gëtt.

Och wann de Virus net sou iwwerdroe gëtt, kann de Virus a Sportinfrastrukturen duerch Kontakt mat kontaminéierten Objeten (z.B. Fitnessausrüstung) iwwerdroe ginn.

Kann ee sech beim Schwamme mat COVID-19 infizéieren?

Aktuell gëtt et keng Etüd zum Iwwerliewe vum SARS-CoV-2 am Waasser vun enger Schwämm. D'Waaser an der Schwämm schéngt awer keng gutt Plaz fir d'Iwwerliewen an d'Enwécklung vum Virus ze sinn.

Ech hunn en Ticket fir en Evenement kaaft, deen awer opgrond vun der Corona-Epidemie huet missen ofgesot ginn. Wéi eng Méiglechkeeten hunn ech?

Wann een Evenement opgrond vun de Mesurë vun der Regierung am Kader vun der Corona-Epidemie ofgesot gëtt, da kann den Ticket rembourséiert ginn.

Wann een Evenement opgrond vun de Mesurë vun der Regierung am Kader vun der Corona-Epidemie verluecht gëtt, da sinn d'Ticketen a priori net remboursabel, ausser de Keefer vum Ticket huet keng Méiglechkeet um verluechten Evenement deelzehuelen.

 

Last update