Ëffentlech a privat Versammlungen

Versammlungen, dobannen an dobaussen, sinn erlaabt.

Et ass allerdéngs weiderhi wichteg, seng perséinlech Kontakter an Deplacementer op e Minimum ze reduzéieren an d'Geste-barrièren ze respektéieren.

CovidCheck

De CovidCheck-System ass ee System, dee fir Privatpersounen a privat an ëffentlech Etablissementer (z.B. Restauranten, Baren, Fitnesszenteren, Butteker, asw.) oder Evenementer (z.B. Sportsevenementer, Concerten, asw.) gëllt, déi fir d'Ëffentlechkeet zougänglech sinn a bei deenen den Zoutrëtt nëmme Persounen (Clienten, Gäscht, Spectateuren, Personal, Opsiichtspersonal) virenthalen ass, déi geimpft, geheelt oder negativ getest goufen (entweder duerch ee Selbsttest op der Plaz oder duerch een zertifiéiert negatiivt Resultat). Kanner vu manner wéi 6 Joer musse kee Selbsttest op der Plaz maachen oder COVID-19-Zertifikat virweisen. 

Wann Dir méi wéi 10 Persounen op Äre privaten Event aluede wëllt, ouni dobäi d'Maskeflicht oder d'Distanzreegel vun 2 Meter oder och eng Sëtzplaz-Flicht anhalen ze mussen, da musst Dir Iech fir de CovidCheck-System entscheeden. 

Fir méi Informatiounen iwwert de CovidCheck-System an d'Prozedur fir de System ze deklaréieren, besicht eis Säit zum Thema CovidCheck-System.

Maskeflicht an Distanzen

Et muss eng Mask gedroe ginn:

  • ënner allen Ëmstänn bei ëffentlech zougänglechen Aktivitéiten, wou de Public an engem zouene Raum zirkuléiert (z.B. ëffentlech Administratiounen, Butteker oder Supermarchéen), ausser bei Aktivitéiten ënnert dem CovidCheck-System.
  • am ëffentlechen Transport
  • bei Versammlunge vu méi wéi 10 Persounen

Zousätzlech zu der Mask ass bei alle Versammlunge vun 11 Persounen a méi eng physesch Distanz vu mindestens 2 Meter virgeschriwwen. D'Obligatioun eng Mask ze droen an déi physesch Distanz vu mindestens 2 Meter anzehalen, gëllt net fir Persounen, déi zum selwechte Stot gehéieren oder zesumme wunnen, an och net fir Gruppe vun net méi wéi 4 Persounen.

Nieft der Flicht eng Mask ze droen an eng physesch Distanz vu mindestens 2 Meter anzehalen, sinn zougewise Sëtzplaze bei Versammlunge vun 51 a bis 300 Persounen (inclus) obligatoresch. D'Obligatioun déi physesch Distanz vu mindestens 2 Meter anzehalen, gëllt net fir Persounen, déi zum selwechte Stot gehéieren oder zesumme wunnen, an och net fir Gruppe vun net méi wéi 4 Persounen.

Vun dëser Flicht eng Mask ze droe sinn net betraff::

  • Kanner ënner 6 Joer
  • Leit mat engem Handicap oder Pathologie, déi een entspriechenden Attest vum Dokter hunn
  • Riedner oder reliéis Acteure wärend der Ausübung vun hire berufflechen Aktivitéiten
  • Acteuren aus dem Theater- a Filmberäich wärend der Ausübung vun hiren Aktivitéiten
  • Museker an Dänzer wärend der berufflecher Ausübung vun hiren Aktivitéiten

D'Flicht 2 Meter Distanz anzehale gëllt net fir Mäert am Fräien, sou wéi och net beim Benotze vum ëffentlechen Transport.

D'Obligatioun Sëtzplazen zougewisen ze kréien, gëllt weder am Kader vum Demonstratiounsrecht, nach bei Begriefnesser, nach op Mäert, nach am Zesummenhang mat sportlechen Aktivitéiten oder dem ëffentlechen Transport.

Sportlech a musikalesch Aktivitéiten ënnersti spezifesche Reegelen.

Privat Versammlungen

Privat Versammlungen oder privat Evenementer ënnerleien deenen allgemenge Reegele fir Versammlungen. Bei private Feieren, mat net méi wéi 10 Invitéen, gëllen also keng Restriktiounen oder sanitär Mesuren. Ab 11 Persoune gëllt awer eng Maskeflicht an eng Distanz vun 2 Meter muss tëschent de Persounen agehale ginn. Ab 51 Persoune gëllt eng Sëtzplaz-Flicht.

D'Kanner ginn onofhängeg vun hirem Alter matgezielt. Net matgezielt gi Persounen, déi am Kader vun hirer berufflecher Aktivitéit am Haushalt sinn, a Persounen déi sech am Kader vum Besuchs- an Ëmgangsrecht ("droit de visite et d'hébergement") oder wéinst alternéierendem Wunnsëtz am Haushalt befannen.

Privat Versammlungen doheem kënnen ënnert dem CovidCheck-System organiséiert ginn. Dëse muss awer am Viraus deklaréiert ginn. An dësem Fall muss de CovidCheck-System awer net siichtbar affichéiert ginn. Fir méi Informatiounen iwwert de CovidCheck-System an d'Prozedur fir de System ze deklaréieren, besicht eis Säit zum Thema CovidCheck-System.

Et ass wichteg déi tëschemënschlech Kontakter ze limitéieren, wéi och d'Unzuel vu Leit déi ee bei sech invitéiert, well all zousätzlech Persoun, déi een invitéiert, e weidere Risk um Niveau vun der Transmissioun vum Virus bedeit.

Ëffentlech Versammlungen

All Versammlung vu méi wéi 300 Persounen ass verbueden.

All Versammlung vun 11 bis 50 Persounen (inclus) verlaangt, datt d'Persounen eng Mask droen an d'Distanzreegel vun 2 Meter anhalen.

Versammlunge vun 11 bis 300 Persoune kënnen ënnert dem CovidCheck-System oflafen. Dëse muss awer deklaréiert ginn. An deem Fall gëllen d'Flicht eng Mask ze droen, eng Distanz vun 2 Meter anzehalen an eng Sëtzplaz zougewisen ze kréien, net.

Bei verschiddenen Evenementer si méi wéi 300 Persounen a bis zu maximal 2.000 Persounen zougelooss, ënnert der Bedéngung dass een entspriechende sanitäre Protokoll am Virfeld vun der Gesondheetsdirektioun validéiert gouf, wou déi obligatoresch sanitär Mesurë festgehale ginn.

Ëffentlech Versammlunge kënnen ënnert dem CovidCheck-System organiséiert ginn.

Fir méi Informatiounen iwwert de CovidCheck-System an d'Prozedur fir de System ze deklaréieren, besicht eis Säit zum Thema CovidCheck-System.

Geldstrofen

Bei engem Verstouss géint dës Virschrëfte riskéiert d'Persoun e Protokoll vun 500 bis 1.000 Euro. Wat den Avertissement taxé ubelaangt, leit dësen elo bei 300 Euro. 

FAQ

Wéi vill Persoune kënne mir bei eis Heem invitéieren?

Dir kënnt esou vill Persounen alueden, wéi Dir wëllt. Et gëllen dobäi déi allgemeng Reegele fir Versammlungen. Ab 11 Persoune gëllt d'Maskeflicht an eng Distanz vun 2 Meter muss tëschent de Persounen agehale ginn. Ab 51 Persoune gëllt eng Sëtzplaz-Flicht.

Persounen, déi sech am Kader vum Besuchs- an Ëmgangsrecht ("droit de visite et d'hébergement") oder mat alternéierendem Wunnsëtz am Haushalt befannen, ginn hei net matgezielt. Dat selwecht gëllt fir Persounen, déi am Kader vun hirer berufflecher Aktivitéit am Haushalt sinn.

Beispiller: Wann Ären Haushalt aus 4 Persoune besteet, kënnt Dir bis zu 10 Persounen alueden, ouni speziell Reegele respektéieren ze mussen. Wann Dir awer 11 Persounen alued, musst Dir eng Mask droen an d'Distanzreegel vun 2 Meter anhalen.

Wann Ären Haushalt aus 4 Persoune besteet, an ee Kand aus enger fréierer Bezéiung geleeëntlech bei Iech wunnt, da kënnt Dir ëmmer nach 10 Persounen alueden, ouni speziell Reegele respektéieren ze mussen.

Wann Ären Haushalt aus 4 Persoune besteet, an Dir een Traiteur bestellt, fir de Service an d'Iessen zouzebereeden, da kënnt Dir 10 Persounen alueden, ouni speziell Reegele respektéieren ze mussen. D'Personal vum Traiteur zielt nämlech net mat.

Wann Dir méi wéi 10 Persounen aluede wëllt, ouni dobäi d'Maskeflicht oder d'Distanzreegel vun 2 Meter oder och eng Sëtzplaz-Flicht anhalen ze mussen, da musst Dir Iech fir de CovidCheck-System entscheeden. 

Kann ech Bewunner an engem Altersheem besichen?

Nëmme geimpften, geheelten oder negativ geteste (mat Certificat) Persounen dierfe Bewunner vun Altersheemer besichen, ouni an der Entrée vum Etablissement een Test maachen ze mussen. Visiteuren, déi net geimpft oder geheelt sinn, oder déi kee Certificat virweise kënnen, dass si negativ op SARS-CoV-2 getest gi sinn, mussen een Antigène-Selbsttest op der Plaz maachen, woubäi d'Resultat negativ muss sinn. 

Wann ech gären op de Maart ginn, ofgesi vun der Maskeflicht, ginn et do aner Obligatiounen a Limitatiounen un déi ech muss denken?

Nee. D'Verbuet fir d'Versammlunge vu méi wéi 300 Leit zielt net fir d'Mäert. Och d'Obligatioun vun de Sëtzplazen oder d'Flicht eng tëschemënschlech Distanz vun 2 Meter ze respektéieren, zielen an deem Fall och net. 

Ech gi bestuet. Dierf ech fir meng Hochzäit eng Feier organiséieren?

Jo, et gëllt awer e puer Reegelen ze respektéieren.

Wann Är Hochzäitsfeier an engem Restaurant stattfënnt, gëllen déi selwecht Reegele wéi fir den Horeca-Secteur.

Wann de Restaurant sech fir de CovidCheck-System entscheet, da mussen déi Reegele respektéiert ginn.

Dir kënnt Är Feier awer z. B. och an engem Kulturzenter oder all aner Hal organiséieren, déi dofir gelount gëtt.

Wann Dir en Traiteur rufft, dann zielen d'Reegele vum Horeca-Secteur. Wann Dir keen Traiteur rufft, da musst Dir, ab 11 Persounen, d'Maskeflicht, d'Distanzflicht vun 2 Meter an eventuell och d'Sëtzplaz-Flicht respektéieren.

Dir kënnt Iech an all Fall fir de CovidCheck-System entscheeden. 

Mir hunn een Haus mat engem grousse Gaart. Dierf ech do meng Hochzäit/meng privat Veranstaltung organiséieren, mat engem Caterer deen sech ëm d'Iessen an d'Gedrénks këmmert?

Jo. An deem Fall zielen d'Reegele vum Horeca-Secteur

Dierf ech op menger Hochzäit/Feier/Evenement Freedefeier am Gaart vum Restaurant/vum Lokal wou ech feieren organiséieren? Dierf een op dësem Evenement danzen?

Jo. Et muss een awer tëschent Hochzäiten/Feier ënnert dem CovidCheck-System an deenen aneren ënnerscheeden.

Fir Hochzäiten/Feieren/Evenementer ënnert dem CovidCheck-System, gëlle keng speziell Mesuren um Niveau vun de Geste-barrièren.

Fir Hochzäiten/Feieren/Evenementer ouni CovidCheck-System, mussen d'Reegele fir Versammlungen oder den Horeca-Secteur (ouni CovidCheck-System) respektéiert ginn. Wat d'Freedefeier ugeet, esou kann dëst organiséiert ginn, mee d'Invitéë mussen et vun hirer Sëtzplaz aus kucken an d'Reegele vun der Distanz- an der Maskeflicht anhalen. 

Eis Entreprise géif gäre virun der Summervakanz hiert järlecht Grillfest mat Caterer organiséieren. Dierf dat, ënnert dem CovidCheck-System, an de Lokalitéite vun der Entreprise stattfannen?

Jo. Dir musst de CovidCheck-System awer bei der Gesonheetsdirektioun (Direction de la santé) umellen an déi entspriechend Reegelen applizéien.

Mir hunn eng Kantin an eiser Entreprise. Dierfe mir an der Kantin eng Feier fir eis Mataarbechter organiséieren?

Jo. Kantinnen zielen als Etablissementer aus dem Horeca-Secteur. Deemno dierf hei eng Feier am Respekt vun den entspriechende Reegele fir den Horeca-Secteeur organiséiert ginn. 

Dir kënnt Iech och fir de CovidCheck-System entscheeden.

Mir géife gäre mat eisem Veräin oder eisem Betrib e Grillfest ouni Caterer organiséieren. Ass dat méiglech? An dierfe mir Spiller fir d'Kanner virgesinn?

Jo, awer ënnert der Bedéngung dass Dir mam CovidCheck-System schafft. Mat dësem System kënnt Dir selwer grillen an och Aktivitéite fir d'Kanner organiséieren. De CovidCheck-System erméiglecht Iech Är Veranstaltung ouni Restriktiounen z'organiséieren, och wann dës weiderhi recommandéiert sinn. Kanner ënner 6 Joer brauche keen Test ze maachen a keen negativen Test-Certificat virzeweisen. 

Last update